Менгарвыканкам дазволіў адзначыць 24-ую гадавіну Чарнобыльскай катастрофы. Чыноўнікі пагадзіліся на збор удзельнікаў акцыі каля Акадэміі навук, але адмовілі ў правядзеньні шэсьця праспэктам Незалежнасьці да Кастрычніцкай плошчы.

Замест гэтага яны прапанавалі прайсьці вуліцай Сурганава да плошчы Бангалор і завяршыць акцыю ў парку Дружбы народаў.

Арганізатары "Чарнобыльскага шляху" адмовіліся пайсьці на плошчу Бангалор. Яны заявілі, што жалобнае шэсьце пачнецца ад Акадэміі Навук спачатку па праспэкце Незалежнасьці, а потым па вуліцы Сурганава да Чарнобыльскай капліцы. Там людзі запаляць сьвечкі і ўскладуць кветкі. Пасьля гэтага адбудзецца супольная малітва і на гэтым акцыя завершыцца.


Паводле http://www.svaboda.org/